Профессор Перизат Сейітқазының ғылыми-педагогикалық еңбегі жоғары бағаланды
2026 жылғы 20 қазанда Л.Н. Гумилев атындағы Еуразия ұлттық университетінде педагогика ғылымдарының докторы, профессор Сейітқазы Перизат Байтешқызының 60 жасқа толуына арналған мерейтойлық іс-шара өтті. Тағылымды жиын ғалымның ғылыми-педагогикалық қызметі мен отандық педагогика ғылымының дамуына қосқан үлесін танытуға арналды.
Салтанатты іс-шараға университет басшылығы, профессор-оқытушылар құрамы, белгілі ғалымдар, әріптестері, шәкірттері, докторанттар мен магистранттар қатысты. Жиын барысында профессор Перизат Байтешқызының ұстаздық жолы, ғылыми зерттеулері, білім беру саласына енгізген жаңашыл идеялары және ғылыми кадрлар даярлаудағы еңбегі кеңінен сөз болды.
Мерейтойлық шараның маңызды сәттерінің бірі – Қазақстан Республикасы Президентінің жанындағы Қазақстан Республикасының Ұлттық ғылым академиясы атынан профессорға Академияның 80 жылдығына арналған мерекелік медаль мен Алғыс хаттың табысталуы болды.
Қазақстан Республикасы Ұлттық ғылым академиясының президенті Ақылбек Күрішбаевтың атынан жолданған Алғыс хатта:
«Сіздің көпжылдық ғылыми-педагогикалық еңбегіңіз еліміздегі медиабілім мен цифрлық педагогиканың өркендеуіне елеулі үлес қосты. Отандық ғылым мен білімнің әлеуетін арттыруға, білікті мамандар мен жас ғалымдарды даярлауға қосқан үлесіңіз үшін Сізге зор алғысымды білдіремін», – деп көрсетілген.
Профессор Перизат Байтешқызының зерттеулерінде медиабілім, цифрлық педагогика, білім беруді цифрландыру, заманауи педагогикалық технологиялар, болашақ мамандарды кәсіби даярлау, білім алушылардың коммуникативтік және ақпараттық мәдениетін қалыптастыру мәселелері қарастырылады. Ғалымның еңбектері педагогика ғылымының теориялық негіздерін толықтырумен қатар, цифрлық ресурстар мен жаңа оқыту технологияларын білім беру тәжірибесінде тиімді қолдануға бағытталған.
Ақпараттық қоғам жағдайында білім алушылардың медиасауаттылығын қалыптастыру, цифрлық ортада жауапты әрекет ету дағдыларын дамыту және жаңа технологияларды оқу үдерісіне енгізу аса маңызды міндеттердің біріне айналды. Осы тұрғыдан алғанда, профессордың ғылыми ізденістері қазіргі білім беру жүйесінің өзекті қажеттіліктерімен сабақтасып, практикалық маңызға ие болып отыр.
Ғалымның кәсіби қызметінде жас зерттеушілерді қолдау мен ғылыми кадрлар даярлау ісі ерекше орын алады. Ол студенттерге, магистранттар мен докторанттарға дәріс беріп, олардың ғылыми ізденістеріне бағыт-бағдар көрсетіп келеді. Жас ғалымдардың зерттеу мәдениетін қалыптастыруға, ғылыми ойлау қабілетін дамытуға және заманауи педагогикалық мәселелерді терең зерделеуіне жүйелі түрде қолдау білдіруде.
Қазақстан Республикасы Ұлттық ғылым академиясының Алғыс хаты мен 80 жылдық мерекелік медалі – профессор Перизат Сейітқазының медиабілім мен цифрлық педагогиканы дамытудағы, білікті мамандар мен жас ғалымдарды даярлаудағы көпжылдық еңбегіне берілген жоғары баға. Бұл марапат ғалымның отандық ғылым мен білім саласындағы нәтижелі қызметінің және кәсіби жетістіктерінің лайықты мойындалғанын білдіреді.
